As dit voel of jy net nie meer basiese uitgawes met jou salaris kan dek nie, is jy nie alleen nie. Alhoewel Suid-Afrikaners se salarisse verlede jaar gemiddeld 5% toegeneem het, het die inflasiekoers op 6% gestaan. Gevolglik het verbuikers se koopkrag verder afgeneem sedert dit laas jaar reeds drie persentasiepunte gedaal het. Terwyl baie gesinne hulself tot krediet wend om dit deur die maand te maak, is daar ander maniere om slimmer met jou finansies te werk. AfriSKuld is besorg oor jou finansiële welstand, daarom deel ons graag ‘n paar wenke om slim te begroot.
- Kies die regte formaat vir jou begroting
Die sleutel tot finansiële bestuur is om die regte hulpmiddel te vind wat jy konsekwent kan gebruik. Daar is verskeie aanlyn raamwerke en toepassings soos 22Seven, maar moenie Excel of pen en papier onderskat nie. Vind wat vir jou die gemaklikste werk.
- Lys inkomste en uitgawes
Om bewus te raak van hoeveel geld jy maandeliks inkry teenoor hoeveel jy werklik uitgee is ‘n goeie begin. Indien jy meer realistiese syfers op jou uitgawes wil bekom, kan jy op jou banktoepassing kyk hoeveel dit in sekere kategorië opgedeel het. Moenie vergeet om bankfooie en debietorders in te sluit nie.
- Besin oor jou uitgawes
Gaan elke uitgawe na en dui aan watter noodsaaklik (N), nie-noodsaaklik (NN) en luukshede is (L). Hierna is dit belangrik om te kyk watter nie-noodsaaklike (NN) en luukshede (L) jy uit kan sny of jou besteding kan beperk. Die algemene reël is om luukshede sover moonlik te elimineer, terwyl jy nie-noodsaaklike uitgawes kan verminder sonder om dit noodwendig uit te sny. Jy sal verbaas wees waste groot verskil elke bietjie wat jy spaar kan maak! Verder is dit belangrik dat jy ‘n buffer vir onvoorsiene uitgawes in jou begroting insluit wat jy op die stadium kan bekostig.
- Prioritiseer skuldbetalings
Nie alle skuld is slegte skuld nie, maar sommige skuld kan swaarder aan jou sak trek en daarom is dit belangrik om hulle eerste af te betaal deur meer fondse daaraan te allokeer as wat nodig is. Die volgende skuldrekeninge word voorgestel as hoë prioriteit:
- Dié met hoë rentekoerse (bv. ‘payday’ lenings)
- Kredietkaartskuld
- Persoonlike skuld met ongunstige terme en bepalings
- Gesekureerde lenings
- Begroot vir spaargeld
Nadat jy jou uitgawes gesny het en jy terugbetalings aan skuld geprioritiseer het kan jy doelwitte opstel om voor te spaar. Of dit vir jou motor se volgende diens of ‘n naweek se wegbreek is, hou dit jou gemotiveer om elke maand te spaar. Plaas hierdie geld aan die begin van elke maand in ‘n aparte rekening waarop dit rente kan verdien.
Jou begroting is nou gereed, maar of dit finansiële verligting bring sal afhang van hoe getrou jy daarby kan bly. Dit is ook waar dat onvoorsiene omstandighede ‘n mens se beplanning kan kelder, daarom is dit in die langtermyn belangrik om nie net ‘n buffer teen onvoorsiene uitgawes te hê nie, maar ook ‘n behoorlike noodfonds op te bou. Begin vandag begroot om jou finansiële welstand te verbeter en slim besluite te neem wat jou lewenskwaliteit bevorder!
