Skuld, soos tegnologie, televisie en tiramisu, is nie van self goed of sleg nie. Hoe dit toegepas en bestuur word sal uiteindelik bepaal of dit ‘n positiewe of negatiewe impak het. Hierdie artikel is ten doel om jou te help om onderskeid tussen goeie en slegte skuld te tref en noem ook ‘n paar tekens wat aanduiding kan gee dat jy te veel skuld het.

Goeie Skuld

Die goue reël om te bepaal of skuld goeie skuld is, is om jouself af te vra of dit jou netto waarde verhoog of toekomstige waarde het. As dit nie hierdie voordele inhou nie of as jy nie nie oor die nodige kontantvloei beskik om daarvoor te betaal nie, is dit slegte skuld. Die volgende is oor die algemeen voorbeelde van goeie skuld:

• Huislenings: Die finansiering van ‘n huis binne ‘n goeie area kan langtermynvoordele bied soos toename in waarde oor tyd of huurinkomste.
• Besigheidslenings: Indien ‘n besigheid goed bestuur word, kan lenings gebruik word om uit te brei en sodoende groter winste genereer.
• Studielenings: Kwalifikasies kan loopbaanbevordering ontsluit en gevolglik die geleentheid bied om hoër inkomste te genereer.

Slegte Skuld

As iets waarde verloor die oomblik wat jy eienaarskap daarvan neem, is dit slegte skuld. Ongelukkig beskryf dit meeste basiese behoeftes, soos klere, motors en daardie hoë definisie televisie waarop jy rugby kyk. Soos bo-genoem tel dit ook as slegte skuld as jy dit nie kan bekostig nie. Voorbeelde van slegte skuld sluit in:

• Onbeheerde kredietkaartskuld: Wanneer kredietkaartskuld tot die maksimum bedrag gebruik word of hoë balans het, kan dit maklik tot onbeheerbare skuld lei met hoë of veranderlike rentekoerse.
• ‘Pay day’-lenings: Kenners meen hierdie tipe skuld is nog erger as kredietkaartskuld omrede dit ekstra hoë rentekoerse hef en maklik daartoe kan lei dat verbruikers elke maand slegter af is.
• Motorlenings: Alhoewel dit waar is dat ‘n bekostigbare motor jou die nodige vervoer bied om by jou werk uit te kom waar jy ‘n inkomste genereer, word dit oor die algemeen as slegte skuld beskou. Om dit so goed moontlik te bestuur word dit aangeraai dat mens deeglik navorsing doen om ‘n motor aan te koop wat die beste aan jou begroting en behoeftes voldoen.

Vyf tekens dat jy te veel skuld het:

1. Jy sukkel om jou maandelikse afbetalings aan rekeninge na te kom.
2. Jy is afhanklik van krediet om basiese uitgawes te dek.
3. Jy gaan nuwe lenings aan om vorige skuld te betaal.
4. Skuldeisers maak gereed met jou kontak.
5. Jou skuld-tot-inkomste verhouding is hoër as 40%.

Onthou, die sleutel tot suksesvolle skuld bestuur is om binne jou vermoëns te leef en seker te maak dat elke skuld wat jy aangaan 'n positiewe bydrae tot jou finansiële toekoms lewer.